---Advertisement---
पारोळा तालुक्यातील भोंडण गावात अल्पवयीन मुलीच्या अपहरणाची धक्कादायक घटना समोर आली असून या घटनेमुळे संपूर्ण परिसरात खळबळ उडाली आहे. 15 वर्षे 11 महिने वयाच्या मुलीला अज्ञात व्यक्तीने फूस लावून पळवून नेल्याचा संशय व्यक्त करण्यात आला असून याप्रकरणी पारोळा पोलीस ठाण्यात गुन्हा दाखल करण्यात आला आहे.
संबंधित मुलगी आपल्या कुटुंबासह घरी झोपली होती. 13 तारखेच्या रात्री नेहमीप्रमाणे सर्व कुटुंबीयांनी जेवण करून घराच्या पडवीत विश्रांती घेतली होती. मात्र दुसऱ्या दिवशी म्हणजे 14 तारखेला पहाटे साडेतीन वाजेच्या सुमारास मुलीच्या आईला जाग आली असता तिची मुलगी शेजारी झोपलेली नसल्याचे त्यांच्या निदर्शनास आले.
यामुळे कुटुंबीयांची घाबरगुंडी उडाली. त्यांनी तात्काळ घरात तसेच परिसरात मुलीचा शोध घेण्यास सुरुवात केली. नातेवाईक, मित्रमंडळी आणि गावातील ओळखीच्या व्यक्तींकडे चौकशी करण्यात आली. मात्र सर्वत्र शोध घेऊनही मुलीचा कोणताही मागमूस लागला नाही.
अखेर मुलगी बेपत्ता झाल्याची खात्री झाल्यानंतर कुटुंबीयांनी पारोळा पोलीस ठाण्यात धाव घेत तक्रार दाखल केली. फिर्यादीच्या तक्रारीनुसार, अज्ञात व्यक्तीने अल्पवयीन मुलीला फूस लावून कायदेशीर पालकत्वातून पळवून नेल्याचा संशय व्यक्त करण्यात आला आहे. त्यानुसार पोलिसांनी अज्ञात आरोपीविरुद्ध अपहरणाचा गुन्हा नोंदवला आहे.
घटनेचे गांभीर्य लक्षात घेऊन पोलिसांनी तपासाची चक्रे वेगाने फिरवण्यास सुरुवात केली आहे. मुलीचा शोध घेण्यासाठी विविध पथके सक्रिय करण्यात आली असून परिसरातील सीसीटीव्ही फुटेज, मोबाईल कॉल रेकॉर्ड आणि इतर तांत्रिक बाबींची पडताळणी केली जात असल्याची माहिती मिळाली आहे.
या घटनेमुळे ग्रामीण भागातील अल्पवयीन मुलींच्या सुरक्षेचा प्रश्न पुन्हा एकदा ऐरणीवर आला आहे. मुलीचा लवकरात लवकर शोध घेऊन आरोपीला अटक करावी, अशी मागणी गावकऱ्यांसह नागरिकांकडून करण्यात येत आहे. या प्रकरणाचा पुढील तपास सहाय्यक पोलीस निरीक्षक अशोक पिंपळे यांच्या मार्गदर्शनाखाली सुरू आहे.
