सर्वसामान्यांना महागाईचा नवा झटका; भेंडी, गवार, कोबीसह अंड्यांच्या किमतीत वाढ….!

वाढत्या महागाईमुळे आधीच त्रस्त असलेल्या सर्वसामान्य नागरिकांना आणखी एक मोठा आर्थिक झटका बसला आहे. देशातील अनेक भागांमध्ये भाजीपाला आणि अंड्यांच्या किमतीत लक्षणीय वाढ झाली असून, दैनंदिन घरखर्चाचे गणित बिघडले आहे. उशिरा आलेला मान्सून, तीव्र उष्णता आणि उत्पादनातील घट यामुळे बाजारातील दर वाढल्याचे चित्र दिसत आहे.

‘एल निनो’च्या प्रभावामुळे यंदा अनेक भागांमध्ये पावसाचे प्रमाण सरासरीपेक्षा कमी राहण्याची शक्यता आहे. याचा थेट परिणाम शेती उत्पादनावर होत असून भाजीपाल्याचा पुरवठा घटला आहे. परिणामी बाजारात अनेक भाज्यांच्या किमती वाढल्या आहेत.

सध्या कोबी, भेंडी, घेवडा आणि दुधी भोपळा यांसारख्या भाज्या 100 ते 120 रुपये प्रतिकिलो दराने विकल्या जात आहेत. गवार, हिरवे वाटाणे आणि काही इतर भाज्यांचे दर 160 ते 200 रुपये प्रतिकिलोपर्यंत पोहोचले आहेत. टोमॅटो सुमारे 60 रुपये प्रतिकिलो, तर कोथिंबीर, पुदिना आणि मेथीच्या दरातही वाढ झाली आहे.

कारलं, पडवळ, वांगी आणि बटाटे यांसारख्या सर्वसामान्यांच्या रोजच्या वापरातील भाज्यांच्या किमतीतही प्रतिकिलो 20 ते 30 रुपयांची वाढ नोंदवली गेली आहे. याशिवाय स्वयंपाकातील महत्त्वाचे घटक असलेल्या लसूण आणि आल्याचे दरही वाढल्याने गृहिणींचे बजेट कोलमडले आहे.

अंड्यांच्या किमतीतही मोठी वाढ झाली आहे. काही आठवड्यांपूर्वी 74 ते 80 रुपये प्रति डझन दराने उपलब्ध असलेली अंडी आता 90 ते 96 रुपये प्रति डझन दराने विकली जात आहेत. उष्ण हवामानामुळे उत्पादनात घट झाल्याने मागणी आणि पुरवठ्यातील तफावत वाढली असून त्याचा परिणाम किमतींवर झाला आहे.

याशिवाय व्यावसायिक एलपीजी सिलिंडरच्या दरवाढीमुळे हॉटेल आणि खाद्य व्यवसायांवरही अतिरिक्त आर्थिक भार पडला आहे. त्यामुळे बाहेरच्या जेवणाचा खर्च वाढण्याची शक्यता व्यक्त केली जात आहे.

भाजीपाला, अंडी आणि इंधनाच्या वाढत्या किमतींमुळे सर्वसामान्य नागरिकांचे आर्थिक नियोजन विस्कळीत होत असून आगामी काळात महागाई आणखी वाढण्याची भीती व्यक्त केली जात आहे.