---Advertisement---
नाशिक येथील एका बहुराष्ट्रीय कंपनीत महिला कर्मचाऱ्यांच्या छळाच्या कथित प्रकरणाच्या पार्श्वभूमीवर कठोर कारवाईची मागणी करत हिंदू जनजागृती समितीच्या वतीने जळगाव जिल्हाधिकाऱ्यांना निवेदन देण्यात आले.
समितीने दिलेल्या निवेदनात संबंधित प्रकरण केवळ लैंगिक छळापुरते मर्यादित नसून, त्यामागे संघटित स्वरूपातील गंभीर गुन्हेगारी असण्याची शक्यता व्यक्त केली आहे. काही महिला कर्मचाऱ्यांनी केलेल्या तक्रारींचा उल्लेख करत, कामाच्या ठिकाणी छळ, दबाव आणि धार्मिक बाबींशी संबंधित सक्तीचे प्रकार झाल्याचे आरोप करण्यात आले आहेत.
प्रकरणाच्या गांभीर्याचा विचार करून सखोल चौकशी व्हावी, अशी मागणी करण्यात आली आहे. तसेच या प्रकरणात नोंद झालेल्या गुन्ह्यांची व्यापक तपासणी करून संबंधितांवर कठोर कारवाई करावी, असेही निवेदनात नमूद करण्यात आले आहे.
समितीने विविध कायदेशीर बाबींचा उल्लेख करत, कामाच्या ठिकाणी महिलांच्या संरक्षणासाठी असलेल्या कायद्यांची अंमलबजावणी योग्यरीत्या झाली का, याची चौकशी करण्याची गरज व्यक्त केली. तसेच पीडित महिलांना सुरक्षा, कायदेशीर मदत आणि संरक्षण देण्याची मागणी करण्यात आली आहे.
दरम्यान, या प्रकरणी विशेष तपास पथकाद्वारे (SIT) चौकशी, कंपनी व्यवस्थापनाची जबाबदारी निश्चित करणे, तसेच इतर शाखांमध्येही तपास करण्याची मागणी समितीने केली आहे.
प्रशासनाने या निवेदनाची दखल घेऊन योग्य ती कारवाई करावी, अन्यथा आंदोलन छेडण्यात येईल, असा इशाराही देण्यात आला आहे.
