---Advertisement---
जळगाव जिल्हा पोलीस दलात आज एका विशेष सोहळ्यात पदभार हस्तांतरण प्रक्रिया संपन्न झाली. जिल्ह्याचे मावळते पोलीस अधीक्षक डॉ. महेश्वर रेड्डी यांनी नवनियुक्त पोलीस अधीक्षक श्रीकांत ढिवरे यांच्याकडे जिल्ह्याची सूत्रे सुपूर्द केली.
या सोहळ्यानिमित्त जळगाव पोलीस दलातील वरिष्ठ अधिकारी आणि कर्मचारी मोठ्या संख्येने उपस्थित होते. यावेळी मावळते अधीक्षक डॉ. महेश्वर रेड्डी यांना भावपूर्ण निरोप देण्यात आला. पोलीस दलातील त्यांच्या उल्लेखनीय योगदानाबद्दल सहकाऱ्यांनी कृतज्ञता व्यक्त करत त्यांच्याबद्दल आदराची भावना बोलून दाखवली.
पदभार स्वीकारल्यानंतर नवनियुक्त पोलीस अधीक्षक श्रीकांत ढिवरे यांचे जळगाव पोलीस दलाच्या परंपरेनुसार स्वागत करण्यात आले. श्रीकांत ढिवरे यांच्या प्रदीर्घ अनुभवाचा जिल्ह्याला मोठा फायदा होईल, असा विश्वास याप्रसंगी व्यक्त करण्यात आला. त्यांच्या नेतृत्वाखाली जळगाव पोलीस दल अधिक सक्षम, पारदर्शक आणि गतिमान होऊन सर्वसामान्यांना न्याय मिळवून देईल, अशी अपेक्षा व्यक्त केली जात आहे.
या नियुक्तीमुळे जिल्ह्याच्या कायदा आणि सुव्यवस्थेला नवी दिशा मिळण्याची शक्यता वर्तवण्यात येत आहे.
