---Advertisement---
चंद्रशेखर जोशी
जळगाव दिनांक : नगरपालिका व नगरपरिषदेच्या पार्श्वभूमीवर भाजप-शिवसेना व राष्ट्रवादी (अजित पवार गट) यांच्या युतीत पडलेली बिघाडी ही केवळ राजकीय घटना नाही तर हा दोन्ही पक्षांतील स्थानिक कार्यकत्यांमधील हेव्यादाव्यांचा, महत्वाकांक्षांचा उद्रेकच म्हणावा लागेल.
जळगाव जिल्ह्यात सोळा न.पा. व दोन नगरपंचायतींची निवडणुकीची रणधुमाळी सुरू आहे. राज्यातील ‘भाजप-शिवसेना व राष्ट्रवादी (अजित पवार गट) या युतीत निवडणुकीच्या अगोदरपासून फटाके फुटत होते.
अखेर बऱ्याच पालिका क्षेत्रांमध्ये ही युती बिघडल्याचे लक्षात येत आहे. केवळ युतीच फुटली नाही तर दावे प्रतिदावे, आरोप-प्रत्यारोपही सुरू आहेत. तसे पाहीले तर अनेक वर्षे एकत्रित सत्तेची फळे एकत्र चाखताना कुणालाच काही आठवलं नाही पण जागा वाटप, उमेदवार आणि स्थानिक वर्चस्वावर येताच तीनही पक्षांनी एकमेकांच्या घोंगड्यातून हात काढून पळ काढत्याचे लक्षात येत आहे.
जनतेच्या विकासाबद्दल युतीतील हे तिनही पक्ष किती प्रामाणिक आहेत हे स्थानिक पातळीवरील युती फुटल्यानंतरच्या काळात लक्षात येत आहे. स्थानिक पातळीवर गटबाजी, अहंकाराची चढाओढ आणि मतांचे राजकारण है गेल्या आठवडाभरात समोर आले आहे. ज्या मतदार संघात त्या-त्या पक्षाचा आमदार तो आपल्या वर्चस्वासाठी प्रयत्न करणार हे स्वाभाविक आहे. पण काही प्रमाणात तडजोडीही गरजेच्या असाव्यात असे वाटते.
स्वातंत्र्यानंतरच्या कालखंडात राज्यात जवळपास ४० वर्षे काँग्रेस व मित्र पक्षांची सत्ता होती. युती म्हणा की आघाडी जनतेच्या विकासाबद्दल हे पक्ष किती प्रामाणिक आहेत हे युती वा आघाडी फुटल्यानंतर लक्षात येते. एकीकडे विकासासाठी आम्ही एकत्र आलो असे सांगत जनतेला गोड गोळ्या दिल्या जातात आणि दुसरीकडे स्थानिक पातळीवर गटबाजी, स्वार्थ पदलालसेची पोळी भाजल्यावर आम्हीच कसे खरे हे दाखविण्याचा प्रयत्न केला जात असतो. शेवटी उरले काय? तर अहंकाराची चढाओढ आणि मतांची वाटणी. या बिघाडीचा परिणाम निवडणुकीपुरता मर्यादित राहणार नाही. स्थानिक स्वराज्य संस्थांमध्ये आधीच विकासकामे संथ, निधी वितरण मंद आणि नेतृत्व गोंधळलेले असा प्रकार लक्षात येत आहे.
आता तिनही पक्ष स्वतंत्र लढणार म्हणजे मतांचे तुकडे, सत्तास्थापनेत गोंधळ आणि प्रशासन ठप्प करणारी राजकीय लढाई असेच चित्र दिसेल. यातून जनतेला मिळणार काय? राज्य आणि केंद्रातील सत्ता एकत्र चालवताना सर्व काही सुरळीत दिसतेः पण येथे मात्र स्थानिक नेत्यांचा अहंकार आणि वर्चस्ववाद यांनी चित्रच पालटून टाकले. आज स्थानिक पातळीवर सांगितले जात आहे की, जनतेच्या हितासाठी स्वतंत्र लढत आहोत… यात कितपत तथ्य आहे. निवडणुकीत कोण जिंकले, ते नंतर ठरेल पण या राजकीय बिघाडीने एवढे मात्र सिद्ध केले आहे की महाराष्ट्रातील स्थानिक राजकारण आज पक्षनिष्ठेने चालत नाही. आज सर्वच पालिका क्षेत्रात टोलेजंग कुरघोडी केली जात असल्याचेच दृश्य पहायला मिळतेयं.
स्थानिक स्वराज्य संस्थाच्या माध्यमातूनच खरा विकास घडून येतो. जनतेला रस्ते, पाणी, पथदिवे या सारख्या प्राथमिक गरजा पूर्ण करणारा तो आमचा हेच समजते. फार काही झाले तर पक्ष कोणत्या विचारधारेचा यावर मतदान होत असल्याचेही लक्षात येते. जिल्ह्यात अनेक पालिका व नगरपरिषदांच्या क्षेत्रात पाणी व रस्त्यांची परिस्थिती गंभीर आहे. स्थानिक पातळीवरील विचार करता लक्षात येते की विकासाच्या रस्त्यावर अहंकार हेच मोठे खड्डे बनले आहे. केवळ हीच निवडणूक आहे असे नाही, भविष्यात जिल्हा परिषद, पंचायत समिती तसेच महापालिकांच्या निवडणुका होणार आहेत. भारतीय जनता पार्टी व शिवसेना (शिंदे गट) हे एक विचार घेऊन जनतेसमोर गेले होते व भविष्यातही जातील यात शंका नाही. त्यामुळे एकमेकांमध्ये अगदी स्थानिक पातळीवरील समन्वय आतापासून दिसला पाहीजे. राज्यातील देवेंद्र फडणवीस यांच्या नेतृत्वाखालील सरकार हे विकासाला महत्व देणारे आहे. राज्यातच नव्हे तर प्रत्येक मतदार संघाचा विकास कसा साध्य करता येईल यावरच मुख्यमंत्री फडणवीस हे लक्ष ठेऊन आहेत. याचाच प्रामुख्याने विचार करून विकासाच्या गंगेची माहिती जनतेपर्यंत पोहोचविणे गरजेचे आहे… तेव्हाच भविष्यातील यश हे सहज शक्य होईल.
