---Advertisement---
जळगाव शहरातून जाणाऱ्या मुंबई-नागपूर महामार्गावर धावत्या ट्रकला अचानक भीषण आग लागल्याची थरारक घटना समोर आली आहे. ट्रक धावत असताना टायर फुटल्यानंतर लागलेल्या या आगीत ट्रकचे मोठ्या प्रमाणात नुकसान झाले. मात्र चालक आणि क्लीनर यांनी प्रसंगावधान राखत वेळीच ट्रकमधून उड्या मारल्याने मोठी जीवितहानी टळली.
सदर ट्रक हा गुजरात येथून रिफाइंड तेल, ऑइल पावडर आणि इतर साहित्य घेऊन हैदराबादच्या दिशेने जात होता. प्रवासादरम्यान महामार्गावर अचानक ट्रकचा टायर फुटला. त्यानंतर ट्रकमधून धूर निघू लागला आणि काही क्षणांतच आगीने भीषण रूप धारण केले.
ट्रकमध्ये चालक गौतम कुमार आणि क्लीनर उपस्थित होते. आग लागल्याचे लक्षात येताच दोघांनीही तत्काळ ट्रक थांबवून बाहेर उड्या मारल्या. त्यांच्या सतर्कतेमुळे संभाव्य मोठी दुर्घटना टळली आणि कोणतीही जीवितहानी झाली नाही.
घटनेची माहिती मिळताच अग्निशमन दल आणि संबंधित यंत्रणा घटनास्थळी दाखल झाली. आगीवर नियंत्रण मिळवण्यासाठी तातडीने प्रयत्न करण्यात आले. मात्र तोपर्यंत ट्रकचे मोठ्या प्रमाणात नुकसान झाले होते.
या घटनेमुळे काही काळ मुंबई-नागपूर महामार्गावरील वाहतुकीवर परिणाम झाला. घटनास्थळी वाहनांच्या रांगा लागल्या होत्या. पोलिसांनी वाहतूक सुरळीत करण्यासाठी आवश्यक उपाययोजना केल्या.
ट्रक चालक गौतम कुमार यांनी दिलेल्या प्राथमिक माहितीनुसार, टायर फुटल्यामुळे आग लागल्याचा अंदाज व्यक्त करण्यात येत आहे. मात्र आगीचे नेमके कारण शोधण्यासाठी पुढील तपास सुरू आहे.
