---Advertisement---
जळगाव : जळगाव शहर महानगरपालिका निवडणुकीच्या प्रचाराचा अंतिम टप्पा सुरू असतानाच राष्ट्रवादी काँग्रेस (शरद पवार) गटाला जळगावात मोठा धक्का बसला आहे. पक्षाचे युवक जिल्हाध्यक्ष विश्वजीत पाटील यांनी आपल्या पदाचा आणि पक्षाच्या प्राथमिक सदस्यत्वाचा तडकाफडकी राजीनामा दिला आहे. निवडणुकीच्या अवघ्या दोन दिवस आधी घडलेल्या या घटनेमुळे जिल्ह्यात राजकीय चर्चांना उधाण आले आहे.
विश्वजीत पाटील यांनी राष्ट्रवादी युवक काँग्रेसचे प्रदेशाध्यक्ष महेबूब शेख यांना अधिकृत राजीनामा पत्र पाठवले आहे. या पत्रात त्यांनी राजीनाम्याचे कारण स्पष्ट करताना नमूद केले आहे की, “मी माझ्या वैयक्तिक कारणामुळे राष्ट्रवादी काँग्रेस पार्टी शरदचंद्र पवार पक्षाच्या प्राथमिक सदस्यत्वाचा आणि युवक जिल्हाध्यक्ष पदाचा राजीनामा देत आहे.”
पक्षाने आपल्यावर विश्वास ठेवून मोठी जबाबदारी दिल्याबद्दल त्यांनी कृतज्ञता व्यक्त केली आहे. तसेच पक्षाचे नेते, जिल्हा व तालुकास्तरीय पदाधिकारी आणि कार्यकर्त्यांनी दिलेल्या प्रेमळ वागणुकीबद्दल त्यांनी आभार मानले असून, “या पक्षाचा मी आजन्म ऋणी राहील,” असेही त्यांनी आपल्या पत्रात नमूद केले आहे.
विश्वजीत पाटील यांच्या राजीनाम्यामुळे राष्ट्रवादी युवक काँग्रेसच्या कार्यकर्त्यांमध्ये आश्चर्य व्यक्त केले जात आहे. अलीकडच्या काळात अनेक मातब्बर नेत्यांच्या पक्षबदलानंतर शरद पवार गटाकडून संघटनात्मक मजबुतीवर विशेष भर दिला जात आहे. अशा परिस्थितीत युवक संघटनेतील जिल्हास्तरीय नेतृत्वाचा राजीनामा पक्षासाठी आव्हानात्मक ठरू शकतो, अशी चर्चा राजकीय वर्तुळात सुरू आहे.
आगामी काळात जळगाव जिल्ह्यात युवक नेतृत्वाची नवी फळी उभारण्याचे आव्हान राष्ट्रवादी काँग्रेसच्या नेतृत्वासमोर उभे राहणार आहे. दरम्यान, विश्वजीत पाटील यांनी आपल्या राजीनामा पत्रात पक्ष आणि नेतृत्वाबद्दल आदरभाव व्यक्त केल्याने त्यांनी कोणतीही पक्षविरोधी भूमिका घेतलेली नाही. त्यामुळे भविष्यात ते कोणती राजकीय भूमिका घेतात, पुन्हा सक्रिय राजकारणात सहभागी होतात की काही काळ विश्रांती घेतात, याकडे सर्वांचे लक्ष लागले आहे.
