---Advertisement---
जळगाव जिल्ह्यातील भुसावळ तालुक्यात एक धक्कादायक प्रकार समोर आला असून मोठ्या सिंचन प्रकल्पात घरगुती एलपीजी सिलेंडरचा अवैध वापर होत असल्याचा संशय व्यक्त केला जात आहे. वरणगाव पोलीस स्टेशन हद्दीत सुरू असलेल्या ओझरखेडा डॅमशी संबंधित प्रकल्पात हा प्रकार घडत असल्याची तक्रार नोंदवण्यात आली आहे.
मिळालेल्या माहितीनुसार, हैद्राबाद येथील जी.व्ही.पी.आर इंजिनिअर्स लिमिटेड या कंपनीकडून गेल्या दीड ते दोन वर्षांपासून पाईप वेल्डिंगसाठी घरगुती गॅस सिलेंडरचा वापर केला जात असल्याचा आरोप करण्यात आला आहे. हा प्रकल्प हजारो कोटींचा असून पुढील काही वर्षे सुरू राहणार आहे. मात्र, औद्योगिक वापरासाठी असलेल्या गॅसऐवजी घरगुती सिलेंडर वापरल्यास तो कायद्याने गुन्हा ठरू शकतो.
या प्रकरणी शिवसेनेचे भुसावळ तालुका प्रमुख निलेश ठाकूर यांनी वरणगाव पोलीस ठाण्यात लेखी तक्रार दिली आहे. तक्रारीनंतर पोलिसांनी प्राथमिक तपास सुरू केला असून प्रकल्पातील गॅस वापराची साखळी तपासली जात आहे.
तपासादरम्यान कंपनीकडे असलेल्या विविध प्रकल्प स्थळांवर दररोज किती गॅस सिलेंडर वापरले जातात, ते कुठून आणले जातात आणि त्यांची नोंद कशी ठेवली जाते, याची छाननी केली जाणार आहे. यापूर्वीही या भागात गॅस चोरीचे प्रकरण समोर आल्याने या तपासाला अधिक महत्त्व प्राप्त झाले आहे.
दरम्यान, स्थानिक नागरिकांनी या प्रकाराबाबत चिंता व्यक्त केली आहे. अवैध गॅस वापरामुळे सुरक्षेचा धोका वाढण्यासोबतच सामान्य नागरिकांना मिळणाऱ्या घरगुती गॅस पुरवठ्यावरही परिणाम होऊ शकतो, असे मत व्यक्त केले जात आहे.
सध्या पोलिस तपास सुरू असून, आरोप सिद्ध झाल्यास संबंधितांवर कठोर कायदेशीर कारवाई केली जाणार असल्याचे संकेत देण्यात आले आहेत. या प्रकरणातून मोठ्या गॅस रॅकेटचा पर्दाफाश होण्याची शक्यता व्यक्त होत असून संपूर्ण प्रकरणाकडे लक्ष लागले आहे.
