---Advertisement---
बारामती विधानसभा पोटनिवडणुकीच्या निमित्ताने महाराष्ट्रातील राजकारण चांगलेच तापले आहे. या निवडणुकीसाठी सर्वच पक्षांनी कंबर कसली असून रणनीती आखण्यास सुरुवात केली आहे. अशातच एक मोठी बातमी समोर येत आहे. राज्याच्या उपमुख्यमंत्री सुनेत्रा पवार यांनी थेट उद्धव ठाकरे यांना फोन करून या निवडणुकीत पाठिंबा देण्याची विनंती केली आहे. मात्र, दुसरीकडे काँग्रेसनेही या जागेवर आपला दावा ठोकल्याने ही निवडणूक चुरशीची होणार असल्याचे दिसत आहे.
नेमकी काय चर्चा झाली?
मिळालेल्या विश्वासार्ह माहितीनुसार, सुनेत्रा पवार या बारामती विधानसभेची पोटनिवडणूक बिनविरोध व्हावी यासाठी प्रयत्नशील आहेत. याच पार्श्वभूमीवर त्यांनी शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांच्याशी संपर्क साधला आणि त्यांना पाठिंबा देण्याचे आवाहन केले. इतकेच नाही तर, त्या लवकरच काँग्रेस नेत्यांशीही या विषयावर चर्चा करण्याची शक्यता आहे.
काँग्रेसचा स्वबळाचा नारा
एकीकडे सुनेत्रा पवार निवडणूक बिनविरोध करण्यासाठी प्रयत्न करत असताना, दुसरीकडे काँग्रेसने मात्र वेगळी भूमिका घेतली आहे. काँग्रेसने बारामती आणि राहुरी या दोन्ही पोटनिवडणुकांसाठी आपले उमेदवार रिंगणात उतरवण्याचा निर्णय घेतला आहे. इच्छुक उमेदवारांच्या मुलाखतींची प्रक्रिया आधीच पूर्ण झाली असून, पक्षाच्या हाय कमांडने हिरवा कंदील दिल्याची चर्चा आहे. त्यामुळे बारामतीची निवडणूक बिनविरोध होण्याची शक्यता आता कमी झाली आहे.
राष्ट्रवादीमध्ये अंतर्गत नाराजी?
निवडणुकीच्या धामधुमीत राष्ट्रवादी काँग्रेसमधील अंतर्गत मतभेदही चव्हाट्यावर येताना दिसत आहेत. सुनेत्रा पवार या पक्षाचे कार्याध्यक्ष प्रफुल्ल पटेल आणि प्रदेशाध्यक्ष सुनील तटकरे यांच्यावर नाराज असल्याची चर्चा राजकीय वर्तुळात रंगली आहे. त्यामुळे ६ एप्रिल रोजी उमेदवारी अर्ज दाखल करताना पक्षातील कोणते मोठे नेते त्यांच्यासोबत उपस्थित राहतात, याकडे सर्वांचे लक्ष लागले आहे.
महत्त्वाच्या तारखा:
उमेदवारी अर्ज भरण्याची शेवटची तारीख: ६ एप्रिल २०२६
मतदानाची तारीख: २३ एप्रिल २०२६
निकाल: ४ मे २०२६
