---Advertisement---
नागपूर मध्ये एक धक्कादायक प्रकार समोर आला आहे. मदतीच्या नावाखाली विश्वासघात करत तीन अभियांत्रिकी विद्यार्थ्यांनी एका व्यक्तीची हत्या केल्याची धक्कादायक घटना समोर आली आहे. कार आणि मोबाईल फोनच्या मोहापायी हा गुन्हा केल्याचे प्राथमिक तपासात उघड झाले आहे.
मिळालेल्या प्राथमिक माहितीनुसार, २ एप्रिलच्या रात्री वर्धमान नगर उड्डाणपुलावर एक कार उभी होती. त्या कारमध्ये ४४ वर्षीय व्यक्ती मद्यधुंद अवस्थेत बसलेले होते. त्या ठिकाणीून जात असलेल्या तीन विद्यार्थ्यांनी त्यांच्याशी संपर्क साधत मदत करण्याची तयारी दर्शवली.
सदर व्यक्तीला काही कामानिमित्त बाहेर जायचे असल्याने विद्यार्थ्यांनी त्याला सोबत घेतले. काम पूर्ण झाल्यानंतर त्याला घरी सोडण्याचा प्रयत्न करण्यात आला. मात्र घर बंद असल्याने परिस्थिती बदलली. यानंतर आरोपींच्या मनात कार आणि मोबाईल मिळवण्याचा विचार निर्माण झाला.
त्यानंतर संबंधित व्यक्तीला निर्जन ठिकाणी नेऊन त्याच्यावर हल्ला करण्यात आला. या घटनेत त्याचा मृत्यू झाला. आरोपींनी ओळख पटू नये यासाठी पुरावे नष्ट करण्याचाही प्रयत्न केल्याचे समोर आले आहे.
दरम्यान, दुसऱ्या दिवशी मृतदेह आढळल्यानंतर पोलिसांनी तपास सुरू केला. तांत्रिक तपास, सीसीटीव्ही फुटेज आणि कॉल रेकॉर्डच्या आधारे संशयितांचा माग काढण्यात आला.
पोलिसांनी अल्पावधीतच तिन्ही आरोपींना ताब्यात घेतले. चौकशीत त्यांनी सुरुवातीला दिशाभूल करण्याचा प्रयत्न केला, मात्र पुराव्यांनंतर गुन्ह्याची कबुली दिली. आरोपींकडून संबंधित वाहन आणि मोबाईल जप्त करण्यात आले आहेत.
या घटनेने शहरात खळबळ उडाली असून, क्षणिक लालसेमुळे घडलेल्या या कृत्यामुळे तिन्ही आरोपींचे भविष्य अंधारात गेले आहे. पुढील तपास पोलीस करत आहेत.
