---Advertisement---
जळगाव: राज्यात सध्या सुरू असलेल्या इंधन टंचाईच्या पार्श्वभूमीवर जळगाव जिल्ह्यातून एक अत्यंत धक्कादायक आणि कायदा-सुव्यवस्थेचे वाभाडे काढणारी घटना समोर आली आहे. पेट्रोल-डिझेलचा साठा संपल्याने इंधन देण्यास नकार देणाऱ्या एका २१ वर्षीय पेट्रोल पंप कर्मचाऱ्यावर दोन तरुणांनी चाकूने प्राणघातक हल्ला केला. या हल्ल्यात कर्मचारी गंभीर जखमी झाला असून हा संपूर्ण थरार पंपावरील सीसीटीव्ही (CCTV) कॅमेऱ्यात कैद झाला आहे. या घटनेमुळे संपूर्ण जळगाव जिल्ह्यात आणि पेट्रोल पंप चालकांमध्ये प्रचंड खळबळ उडाली आहे.
मिळालेल्या माहितीनुसार, ही घटना एरंडोल तालुक्यातील म्हसावद जवळील ममताबाद गावातील पेट्रोल पंपावर घडली. तुषार गुरव (वय २१ वर्ष) असे गंभीर जखमी झालेल्या कर्मचाऱ्याचे नाव आहे. गेल्या काही दिवसांपासून जिल्ह्यात इंधनाचा तुटवडा असल्याने या पंपावरील पेट्रोल आणि डिझेलचा साठा पूर्णपणे संपला होता.
दरम्यान, पंपावर दोन तरुण दुचाकीत इंधन भरण्यासाठी आले. कर्मचारी तुषार याने ‘साठा संपल्यामुळे पेट्रोल देता येणार नाही’ असे सांगताच दोन्ही तरुण प्रचंड संतापले. त्यांनी तुषारसोबत आधी जोरदार शिवीगाळ करत वाद घालण्यास सुरुवात केली. काही क्षणातच हा वाद एवढा विकोपाला गेला की, संशयीत तरुणांनी खिशातील धारदार चाकू काढून थेट तुषारच्या पोटात वार केला.
घटनेनंतर हल्लेखोर दुचाकीवरून तात्काळ फरार झाले. पंपावरील इतर कर्मचाऱ्यांनी गंभीर जखमी तुषारला तातडीने जळगाव जिल्हा रुग्णालयात दाखल केले असून, सध्या त्याच्यावर अतिदक्षता विभागात (ICU) उपचार सुरू आहेत. त्याची प्रकृती चिंताजनक असल्याचे समजते.
घटनेची माहिती मिळताच एमआयडीसी पोलीस ठाण्याच्या पथकाने तात्काळ घटनास्थळी धाव घेतली. पोलिसांनी पंपावरील सीसीटीव्ही फुटेज जप्त केले असून, त्यात हा संपूर्ण जीवघेणा हल्ला स्पष्टपणे दिसत आहे.
पोलिसांनी दोन अज्ञात हल्लेखोरांविरोधात प्राणघातक हल्ल्याचा गुन्हा दाखल केला आहे. सीसीटीव्ही फुटेजच्या आधारे आरोपींची ओळख पटवण्याचे काम युद्धपातळीवर सुरू असून, त्यांच्या शोधासाठी पोलिसांची पथके रवाना करण्यात आली आहेत. या घटनेमुळे स्थानिक भागात भीतीचे वातावरण पसरले असून पेट्रोल पंप कर्मचाऱ्यांच्या सुरक्षेचा प्रश्न पुन्हा एकदा ऐरणीवर आला आहे.
