---Advertisement---
महाराष्ट्राच्या कुस्ती जगतातील प्रसिद्ध पैलवान आणि ‘महाराष्ट्र केसरी’ विजेते पै. सिकंदर शेख यांच्या थार वाहनाला भीषण अपघात झाल्याची घटना समोर आली आहे. रत्नागिरी-नागपूर राष्ट्रीय महामार्गावर झालेल्या या अपघातात सिकंदर शेख यांच्या थार गाडीचे मोठे नुकसान झाले असले तरी सुदैवाने ते या दुर्घटनेतून पै. सिकंदर शेख थोडक्यात बचावले आहेत. अपघाताची माहिती समोर येताच त्यांच्या चाहत्यांमध्ये चिंतेचे वातावरण निर्माण झाले होते.
आज सकाळी साडेसहा वाजेच्या सुमारास रत्नागिरी-नागपूर राष्ट्रीय महामार्गावर कवठेमहांकाळ तालुक्यातील विठ्ठलवाडी परिसरात हा अपघात घडला. सिकंदर शेख प्रवास करत असताना त्यांच्या थार वाहनावरील चालकाचे नियंत्रण अचानक सुटले. त्यामुळे भरधाव वेगातील वाहन रस्त्याच्या बाजूला असलेल्या डिव्हायडरवर आदळले. धडक इतकी जोरदार होती की वाहनाच्या पुढील भागाचा अक्षरशः चक्काचूर झाला.
अपघातानंतर काही काळ महामार्गावर गोंधळाचे वातावरण निर्माण झाले. घटनेची माहिती मिळताच स्थानिक नागरिक आणि सिकंदर शेख यांचे चाहते घटनास्थळी जमा झाले. अपघाताची माहिती पोलिसांनाही देण्यात आली. त्यानंतर पोलीस घटनास्थळी दाखल होत पंचनामा आणि पुढील तपासाची प्रक्रिया सुरू केली.
या अपघातात वाहनाचे मोठ्या प्रमाणावर नुकसान झाले असले तरी सिकंदर शेख यांना कोणतीही गंभीर दुखापत झालेली नसल्याची माहिती समोर आली आहे. त्यामुळे त्यांच्या चाहत्यांनी सुटकेचा निश्वास सोडला आहे. सोशल मीडियावरही सिकंदर शेख यांच्या प्रकृतीबाबत विचारणा केली जात असून त्यांच्या अपघाताची बातमी समोर येताच कुस्तीप्रेमींमध्ये चिंतेचे वातावरण निर्माण झाले होते.
मात्र, हा अपघात नेमका कशामुळे झाला, वाहनावरील नियंत्रण कसे सुटले आणि इतर कोणती कारणे यामागे होती का, याचा सखोल तपास हायवे पोलीस करत आहेत. सुदैवाने मोठी जीवितहानी टळली असली तरी या अपघाताने महामार्गावरील सुरक्षित वाहनचालना आणि वेगमर्यादेच्या नियमांचे महत्त्व पुन्हा अधोरेखित झाले आहे.
