राज्यातील एसटी स्थानकांचा बीओटी तत्वावर विकास करण्यात येणार आहे. यासाठी लवकरच निविदा काढण्यात येणार आहेत. या निविदांमध्ये सुरुवातीला जळगावच्या चोपडा एसटी बसस्थानकाचा कायापालट होणार असून या स्थानकाचा बसपोर्टच्या धर्तीवर विकास करण्यात येणार येणार असल्याची माहीती राज्याचे परिवहन मंत्री प्रताप सरनाईक यांनी दिली आहे. नुकतीच परिवहन मंत्र्यांनी गुजरात येथील बसस्थानकांच्या बसपोर्ट म्हणून झालेल्या विकासाची पाहणी केली होती त्यानंतर हा निर्णय घेण्यात आला आहे.
चोपडा बसस्थानकात अत्याधुनिक बसपोर्ट
जळगाव जिल्ह्यातील चोपडा बसस्थानकाला बसपोर्टच्या धर्तीवर विकसित करावी अशी मागणी यावेळी स्थानिक आमदार चंद्रकांत सोनावणे यांनी केली. मध्यप्रदेश राज्याच्या सीमावर्ती भागामध्ये असलेला चोपडा हा आदिवासीबहुल तालुका म्हणून ओळखला जातो. या तालुक्यातील महत्वाचे बसस्थानक म्हणून चोपडा बसस्थानकाला अत्याधुनिक सोयी सुविधायुक्त बनविण्याची मागणी यावेळी सोनावणे यांनी केली. चोपडा बसस्थानकाच्या विकासासंदर्भात लवकरच निविदा प्रक्रिया राबवून बांधा वापरा आणि हस्तांतरित करा या तत्त्वावर हे बसस्थानक विकसित करण्याच्या सूचना मंत्री सरनाईक यांनी संबंधित अधिकाऱ्यांना दिल्या.
