---Advertisement---
मध्यपूर्वेतील वाढत्या राजकीय तणावाचे थेट पडसाद आता देशांतर्गत इंधन बाजारावर उमटू लागले आहेत. शनिवारपासून देशभरात पेट्रोल आणि डिझेलच्या दरात पुन्हा एकदा मोठी वाढ करण्यात आली आहे. विशेष म्हणजे, गेल्या अवघ्या १० दिवसांतील ही तिसरी दरवाढ ठरल्यामुळे सर्वसामान्य जनतेचे बजेट कोलमडले आहे. ताज्या बदलानुसार, पेट्रोल प्रतिलिटर ८७ पैशांनी तर डिझेल प्रतिलिटर ९१ पैशांनी महागले आहे.
या सलग होत असलेल्या दरवाढीमुळे अवघ्या १० दिवसांतच इंधनाचे दर सुमारे ५ रुपयांनी वधारले आहेत. या नव्या दरवाढीनंतर देशातील प्रमुख महानगरांमधील आजचे दर खालीलप्रमाणे आहेत:
महानगरांमधील आजचे नवीन दर (प्रतिलिटर):
मुंबई: पेट्रोलचा दर १०७.५५ रुपयांवरून १०८.४२ रुपये झाला आहे, तर डिझेलचा दर ९४.०५ रुपयांवरून ९४.९६ रुपये प्रतिलिटरवर पोहोचला आहे.
कोलकाता: पेट्रोल १०९.६१ रुपयांवरून ११०.४८ रुपये झाले असून, डिझेल ९६.९५ रुपये प्रतिलिटर झाले आहे.
चेन्नई: पेट्रोलचा दर पूर्वी १०४.५४ रुपये होता, तो आता १०५.४१ रुपये झाला आहे. तर डिझेलचा दर ९६.१६ रुपयांवरून ९७.०७ रुपये प्रतिलिटरपर्यंत वाढला आहे.
इंधन तुटवड्याच्या अफवांवर केंद्र सरकारचे स्पष्टीकरण
दरम्यान, लागोपाठ होत असलेल्या इंधन दरवाढीमुळे काही ठिकाणी पेट्रोल पंपांवर खरेदीसाठी नागरिकांची मोठी गर्दी पाहायला मिळाली. याच गर्दीचा फायदा घेऊन बाजारात इंधनाचा तुटवडा होणार असल्याच्या अफवा पसरवल्या जात आहेत.
मात्र, केंद्रीय पेट्रोलियम मंत्रालयाने हे सर्व दावे पूर्णपणे फेटाळून लावले आहेत. मंत्रालयाने जाहीर आवाहन करताना म्हटले आहे की,
”देशात पेट्रोल आणि डिझेलचा पुरेसा साठा उपलब्ध असून पुरवठा सुरळीत सुरू आहे. नागरिकांनी कोणत्याही प्रकारे घाबरून जाऊन बाजारात किंवा पेट्रोल पंपांवर गर्दी करू नये आणि कोणत्याही अफवांवर विश्वास ठेवू नये.”
सतत वाढणाऱ्या या दरांमुळे वाहतूक खर्च वाढण्याची आणि पर्यायाने इतर जीवनावश्यक वस्तूही महागण्याची शक्यता वर्तवली जात आहे.
