---Advertisement---
जळगाव: येत्या पावसाळ्याच्या पार्श्वभूमीवर शहरात उद्भवू शकणाऱ्या संभाव्य आपत्कालीन परिस्थितीचा सामना करण्यासाठी जळगाव शहर महानगरपालिका प्रशासन पूर्णपणे ‘ॲक्शन मोड’मध्ये आले आहे. मनपा आयुक्तांच्या आदेशानुसार, मंगळवारी मेहरूण तलावाच्या गणेश घाट परिसरात अग्निशमन व आपत्कालीन सेवा विभागामार्फत विशेष शोध व बचाव साहित्य प्रात्यक्षिके (Mock Drill) पार पडली.
पाण्यातील संकटाशी दोन हात करण्याचा सराव
सकाळी ११ ते दुपारी १:३० या वेळेत पार पडलेल्या या सराव सत्राचा मुख्य उद्देश मान्सून काळात निर्माण होणारी पूरस्थिती किंवा बुडण्याच्या दुर्घटनांच्या वेळी बचाव पथकाची तत्परता तपासणे हा होता. यावेळी पथकाने अत्याधुनिक शोध बचाव साहित्याचा प्रभावी वापर कसा करावा, याचे प्रत्यक्ष दर्शन घडवले. तलावाच्या पात्रात बोटींच्या सहाय्याने शोधमोहीम राबवणे आणि बुडणाऱ्या व्यक्तीला सुरक्षित बाहेर काढण्याचे तंत्र यावेळी कर्मचाऱ्यांनी कौशल्याने सादर केले.
ही प्रात्यक्षिके मुख्य अग्निशमन अधिकारी अश्वजीत घरडे, जिल्हा आपत्ती व्यवस्थापन विभागाचे नरवीर रावळ सर आणि केंद्र अग्निशमन अधिकारी भारत बारी यांच्या थेट मार्गदर्शनाखाली पार पडली. यावेळी बचाव कार्यासाठी लागणाऱ्या साहित्याची तांत्रिक तपासणीही करण्यात आली.
या मोहिमेत अग्निशमन दलाच्या कर्मचाऱ्यांनी उत्स्फूर्त सहभाग नोंदवला. यात
वाहन चालक: प्रकाश चव्हाण, निवांत इंगळे, देविदास सुरवाडे, अजय पाटील, भूषण पाटील.
बचाव पथक: तेजस जोशी, सौरभ चिकटे, केतन पाटील, रजनीश भावसार आणि चेतन सपकाळे.
”पावसाळ्यात अतिवृष्टी किंवा अन्य कोणत्याही आपत्तीच्या वेळी अग्निशमन दल किती वेगाने आणि प्रभावीपणे प्रतिसाद देऊ शकते, याचे सादरीकरण आज करण्यात आले. जळगाव मनपाचे बचाव पथक कोणत्याही परिस्थितीला तोंड देण्यासाठी सज्ज आहे.”
— प्रशासन, जळगाव महानगरपालिका
या सरावामुळे आगामी पावसाळ्यात उद्भवणाऱ्या आपत्तींच्या वेळी जीवितहानी टाळण्यासाठी आणि बचाव कार्य अधिक वेगाने करण्यासाठी अग्निशमन दलाला मदत होणार आहे.
