---Advertisement---
अहिल्यानगर जिल्ह्यातील राहुरी तालुक्यातून एक धक्कादायक आणि संतापजनक प्रकार समोर आला आहे. मध्यरात्रीच्या सुमारास एका जावयाने आपल्या सासऱ्याच्या घरासमोर जादूटोणा केल्याचा आरोप करण्यात आला असून, या घटनेमुळे संपूर्ण परिसरात खळबळ उडाली आहे. जादूटोण्याची ही घटना देवळाली प्रवरा परिसरात घडली.
मिळालेल्या माहितीनुसार, घरातील सर्वजण झोपेत असताना रात्री उशिरा संशयास्पद हालचाल झाल्याचा आवाज आल्याने कुटुंबीय जागे झाले. त्यांनी बाहेर येऊन पाहिले असता घराच्या प्रवेशद्वाराजवळ काही विचित्र वस्तू ठेवण्यात आल्याचे त्यांच्या लक्षात आले. यामध्ये टाचण्या टोचलेले लिंबू, काळी बाहुली, हळद-कुंकू यांसारखे साहित्य आढळून आले. याच वेळी घटनास्थळी संशयित व्यक्ती आढळून आली आणि कुटुंबीयांनी त्याला पकडले. तो अन्य कोणी नसून स्वतःचा जावई असल्याचे समोर आले. दरम्यान, त्याच्यासोबत असलेले इतर साथीदार अंधाराचा फायदा घेत घटनास्थळावरून पळून गेले.
या प्रकरणामागे कौटुंबिक वादाची पार्श्वभूमी असल्याची माहिती पुढे येत आहे. संबंधित कुटुंबातील मुलीचा काही काळापूर्वी संशयास्पद मृत्यू झाला होता. त्या प्रकरणात पती आणि सासरच्या मंडळींवर गुन्हा दाखल झाला होता आणि त्यांना अटकही करण्यात आली होती.
सध्या ते जामिनावर बाहेर असल्याची माहिती आहे. या सर्व घडामोडींमुळे दोन्ही कुटुंबांमध्ये तणावाचे वातावरण निर्माण झाले होते.
पीडित कुटुंबीयांच्या म्हणण्यानुसार, जावई हा केवळ जादूटोणा करण्यासाठीच नव्हे तर कदाचित धमकावण्यासाठी किंवा इतर काही उद्देशानेही आला असावा, असा संशय व्यक्त केला जात आहे. तसेच लहान मुलाला घेऊन जाण्याचा प्रयत्न असण्याची शक्यताही नाकारता येत नाही, असेही त्यांनी सांगितले.
घटनेची माहिती मिळताच राहुरी पोलिसांनी घटनास्थळी धाव घेतली. पोलिसांनी घटनास्थळावरून सापडलेले सर्व साहित्य जप्त केले असून, महाराष्ट्र अंधश्रद्धा निर्मूलन कायद्यानुसार गुन्हा दाखल करण्यात आला आहे. या प्रकरणाचा सखोल तपास सुरू असून फरार आरोपींचा शोध घेतला जात आहे.
या घटनेमुळे अंधश्रद्धा आणि अशा प्रकारच्या कृत्यांविरोधात पुन्हा एकदा चर्चा सुरू झाली आहे. २१व्या शतकातही अशा घटना घडत असल्याने चिंता व्यक्त केली जात आहे. नागरिकांनी अंधश्रद्धेला बळी न पडता कायद्याचा आधार घ्यावा आणि अशा प्रकारांची माहिती तात्काळ प्रशासनाला द्यावी, असे आवाहन करण्यात येत आहे.
