---Advertisement---
भुसावळ तालुक्यातील दिपनगर औष्णिक विद्युत निर्मिती केंद्रातील कथित अनियमितता आणि गैरप्रकारांच्या प्रकरणात मोठी प्रशासकीय कारवाई करण्यात आली आहे. या प्रकरणी कार्यकारी अभियंता उमेश रघुनाथ ढोक यांना तात्काळ निलंबित करण्यात आले असून संबंधित आदेश महानिर्मितीच्या मुख्य कार्यालयातून जारी करण्यात आले आहेत.
मिळालेल्या माहितीनुसार, अधिकाराच्या कक्षेबाहेर जाऊन करण्यात आलेली खरेदी, राख व्यवस्थापनातील त्रुटी तसेच कामकाजातील विविध अनियमितता या बाबींमुळे ही कारवाई करण्यात आली आहे. या प्रकरणामुळे प्रकल्पाच्या कार्यपद्धतीसह पर्यावरण आणि सुरक्षिततेबाबतही प्रश्न उपस्थित होत आहेत.
दरम्यान, या प्रकरणाची सखोल चौकशी सुरू असून आतापर्यंत सहा अधिकाऱ्यांच्या बदल्या करण्यात आल्याची माहिती समोर आली आहे. यावरून या प्रकरणाची व्याप्ती अधिक मोठी असण्याची शक्यता व्यक्त केली जात आहे.
सूत्रांच्या माहितीनुसार, या प्रकरणात आणखी काही अधिकारी सहभागी असण्याची शक्यता असून तेही चौकशीच्या कक्षेत आहेत. येत्या काळात आणखी काहींवर कारवाई होण्याची शक्यता वर्तवली जात आहे. या घटनेमुळे दिपनगर प्रकल्पाच्या कारभारावर प्रश्नचिन्ह निर्माण झाले असून स्थानिक स्तरावरही या प्रकरणाची जोरदार चर्चा सुरू आहे.
