---Advertisement---
मुंबई : उद्योगस्नेही धोरणे आणि सक्षम पायाभूत सुविधा यामुळे महाराष्ट्र जागतिक गुंतवणूकदारांसाठी आकर्षणाचे केंद्र बनत असून, ग्लोबल इन्व्हेस्टमेंट हब म्हणून राज्याची ओळख अधिक दृढ होत आहे. मुख्यमंत्री देवेंद्र फडणवीस यांनी यामागे राज्य सरकारच्या उद्योगपूरक धोरणांचा मोठा वाटा असल्याचे सांगितले.
या वाढत्या आंतरराष्ट्रीय रसाची झलक मुंबईत झालेल्या भेटीत दिसून आली. भारतातील डेन्मार्कचे राजदूत रास्मस अबिल्डगार्ड क्रिस्टेनसेन यांनी मुख्यमंत्री फडणवीस यांची ‘वर्षा’ या अधिकृत निवासस्थानी भेट घेतली. या भेटीत गुंतवणूक, बंदर विकास, शिपिंग, ऊर्जा आणि जलव्यवस्थापन या क्षेत्रांमध्ये सहकार्याच्या संधींवर सविस्तर चर्चा झाली.
याचबरोबर, शाश्वत वाहतूक व्यवस्थेकडेही राज्याचा कल वाढत आहे. पाण्यावर आधारित वाहतूक प्रणाली विकसित करण्यासाठी राज्य सरकार प्रयत्नशील असून वॉटर टॅक्सी प्रकल्पावरही काम सुरू आहे. या उपक्रमामुळे शहरातील वाहतूक कोंडी कमी होण्यास मदत होणार आहे. हरित तंत्रज्ञानाच्या दृष्टीने डेन्मार्कमधील इलेक्ट्रिक फेरी आणि वॉटर टॅक्सी तंत्रज्ञानाचा लाभघेण्यासाठी सहकार्याच्या शक्यता तपासल्या जात आहेत.
डेन्मार्कने किनारपट्टीवरील आणि अल्प अंतराच्या प्रवासासाठी इलेक्ट्रिक फेरी तंत्रज्ञान यशस्वीपणे वापरले असल्याने, मुंबई कोकण किनारपट्टीसाठी ते उपयुक्त ठरू शकते, असे क्रिस्टेन्सन यांनी नमूद केले. अशा सहकार्यामुळे महाराष्ट्रात हरित पायाभूत सुविधांचा विकास वेगाने होऊ शकतो. भारत-डेन्मार्क ‘ग्रीन स्ट्रॅटेजिक पार्टनरशिप’ अंतर्गत दोन्ही देशांमधील संबंध अधिक मजबूत होत असून, शाश्वत विकास आणि नवोन्मेष यावर भर दिला जात आहे. महाराष्ट्र या भागीदारीत महत्त्वाची भूमिका बजावण्याच्या स्थितीत आहे.
डेन्मार्कच्या ६० कंपन्या कार्यरत
सध्या मुंबई आणि पुणे परिसरात सुमारे ६० डेन्मार्कमधील कंपन्या विविध क्षेत्रांत कार्यरत आहेत. या मजबूत उपस्थितीमुळे भविष्यातील आर्थिक सहकार्याला अधिक गती मिळण्याची शक्यता आहे. एकूणच, आर्थिक विकास, शाश्वतता आणि जागतिक सहकार्य यांचा समतोल साधत महाराष्ट्र जागतिक गुंतवणूक केंद्र म्हणून वेगाने पुढे जात असल्याचे चित्र स्पष्ट होत आहे.
