---Advertisement---
बीड जिल्ह्यातील एक धक्कादायक आणि चर्चेचा विषय ठरलेली घटना समोर आली असून प्रसिद्ध अध्यात्मिक स्थळ असलेल्या तारकेश्वर गडाचे महंत ह.भ.प. आदिनाथ महाराज शास्त्री यांच्याबाबत घडलेल्या प्रकारामुळे वारकरी संप्रदायासह त्यांच्या भक्तांमध्ये मोठी खळबळ उडाली आहे. गडावरील एका घटनेत महाराज स्वतः जखमी झाल्याचे समोर आले असून सध्या त्यांच्यावर उपचार सुरू आहेत. विशेष म्हणजे या घटनेनंतर चिंतेत पडलेल्या भक्तांना स्वतः महाराजांनी व्हिडिओ संदेशाद्वारे दिलासा दिला असून माझी प्रकृती आता स्थिर आहे आणि लवकरच गडावर परत येणार असल्याचे त्यांनी सांगितले आहे.
बीड जिल्ह्यातील आष्टी तालुक्यातील महिंदा गावाजवळ असलेला तारकेश्वर गड हा परिसरातील एक प्रसिद्ध आणि जागृत देवस्थान म्हणून ओळखला जातो. येथे मोठ्या संख्येने भाविक दर्शनासाठी येत असतात. या गडाचे प्रमुख महंत म्हणून आदिनाथ महाराज शास्त्री कार्य पाहत असून बीड तसेच अहिल्यानगर जिल्ह्यात त्यांच्या भक्तांचा मोठा परिवार आहे.
मिळालेल्या माहितीनुसार, घटनेच्या दिवशी सायंकाळी सुमारे साडेपाच वाजण्याच्या सुमारास महाराजांनी गडावर उपस्थित असलेल्या भक्तांना आपल्या खोलीच्या बाहेर थांबण्यास सांगितले. त्यानंतर ते एकटेच खोलीत गेले. काही वेळानंतर ते गंभीर जखमी अवस्थेत असल्याचे लक्षात आले. ही बाब समोर येताच गडावरील सेवक आणि उपस्थित भक्तांमध्ये एकच खळबळ उडाली. परिस्थितीची गंभीरता लक्षात घेऊन त्यांना तातडीने उपचारासाठी रुग्णालयात हलविण्यात आले.
प्राथमिक उपचारानंतर त्यांना पुढील उपचारासाठी अहिल्यानगर येथील एका खासगी रुग्णालयात दाखल करण्यात आले. येथे डॉक्टरांच्या पथकाने तातडीने शस्त्रक्रिया केली. वैद्यकीय सूत्रांनी दिलेल्या माहितीनुसार, शस्त्रक्रिया यशस्वी झाली असून सध्या महाराजांची प्रकृती स्थिर आहे. संसर्गाचा धोका टाळण्यासाठी पुढील काही दिवस त्यांना पूर्ण विश्रांती देण्यात येणार असून या काळात कोणालाही भेटण्यास परवानगी दिली जाणार नसल्याचेही डॉक्टरांनी स्पष्ट केले आहे.
दरम्यान या घटनेची माहिती समोर आल्यानंतर महाराजांचे अनुयायी आणि भक्त मोठ्या चिंतेत पडले होते. अनेक ठिकाणांहून भक्तांनी त्यांच्या प्रकृतीबाबत चौकशी सुरू केली होती. या पार्श्वभूमीवर स्वतः आदिनाथ महाराज शास्त्री यांनी व्हिडिओ संदेशाद्वारे आपल्या भक्तांना दिलासा दिला. त्यांनी आपल्या संदेशात सांगितले की, “माझी तब्येत आता चांगली आहे, कोणीही काळजी करू नका. मी लवकरच गडावर परत येणार आहे.” त्यांच्या या संदेशामुळे भक्तांमध्ये काहीसा दिलासा व्यक्त केला जात आहे.
आदिनाथ महाराज शास्त्री यांचा बीड तसेच पाथर्डी तालुक्यासह आसपासच्या भागात मोठा भक्तवर्ग आहे. वारकरी संप्रदायात त्यांचा शब्द प्रमाण मानला जातो आणि शांत, संयमी व अध्यात्मिक प्रवचनांमुळे त्यांना विशेष मान मिळतो. त्यामुळे त्यांच्या बाबतीत घडलेल्या या घटनेमुळे भक्तांमध्ये आश्चर्य आणि चिंता व्यक्त होत आहे.
महाराजांनी असे टोकाचे पाऊल का उचलले, याचे नेमके कारण अद्याप स्पष्ट झालेले नाही. संबंधित यंत्रणा आणि स्थानिक प्रशासन या प्रकरणाची अधिक माहिती घेत असून पुढील तपास सुरू आहे. सध्या गड परिसरात सुरक्षा व्यवस्था वाढविण्यात आली असून महाराज लवकर बरे व्हावेत यासाठी भक्तांकडून प्रार्थना करण्यात येत आहे.
