---Advertisement---
जळगाव जिल्हा पोलीस दलासाठी अत्यंत अभिमानाची आणि गौरवास्पद अशी बातमी समोर आली आहे. रामानंद नगर पोलीस ठाण्यात कार्यरत असलेले कर्तव्यदक्ष पोलीस उपनिरीक्षक श्री. संजय एकनाथ शेलार यांना सन २०२६ च्या प्रजासत्ताक दिनानिमित्त मानाचे ‘राष्ट्रपती पोलीस पदक’ जाहीर करण्यात आले आहे. त्यांच्या ३५ वर्षांच्या प्रदीर्घ, प्रामाणिक आणि निष्कलंक सेवेला मिळालेला हा सर्वोच्च सन्मान मानला जात आहे.
श्री. संजय शेलार यांची पोलीस दलातील कारकीर्द म्हणजे शिस्त, समर्पण आणि प्रामाणिकपणाचा आदर्श नमुना आहे. त्यांनी आपल्या सेवाकाळात कायदा-सुव्यवस्था राखण्यासाठी तसेच नागरिकांच्या सुरक्षेसाठी नेहमीच कर्तव्यनिष्ठेने काम केले आहे.
विशेष बाब म्हणजे, ३५ वर्षांच्या सेवेत त्यांना तब्बल २४२ वेळा उत्कृष्ट कामगिरीबद्दल बक्षिसांनी सन्मानित करण्यात आले आहे. एवढेच नव्हे तर त्यांच्या संपूर्ण सेवाकाळात एकही शिक्षा, दंड किंवा ताकीद नोंदवलेली नाही, हे त्यांच्या निष्कलंक सेवाचे ठळक उदाहरण आहे.
आणखी एक उल्लेखनीय बाब म्हणजे, श्री. शेलार यांनी आपल्या दीर्घ सेवेत कधीही आजारपणाची (Sick) रजा घेतलेली नाही. आरोग्याविषयी जागरूकता आणि कामावरील निष्ठा यांचा सुरेख संगम त्यांच्या कारकीर्दीत पाहायला मिळतो.
त्यांच्या या उल्लेखनीय, शिस्तप्रिय आणि आदर्श सेवेची दखल घेत भारत सरकारने त्यांना २०२६ च्या राष्ट्रपती पोलीस पदकाने सन्मानित करण्याची घोषणा केली आहे. या घोषणेमुळे जळगाव जिल्हा पोलीस दलात आनंदाचे वातावरण पसरले असून, वरिष्ठ अधिकारी, सहकारी व नागरिकांकडून श्री. शेलार यांच्यावर अभिनंदनाचा वर्षाव होत आहे.
श्री. संजय शेलार यांना मिळालेला हा सन्मान केवळ वैयक्तिक गौरव नसून, संपूर्ण जळगाव जिल्हा पोलीस दलासाठी अभिमानाची बाब असल्याची भावना सर्वत्र व्यक्त होत आहे.
