---Advertisement---
नाशिकमधील भोंदूबाबा अशोक खरात प्रकरणात दररोज नवे धक्कादायक खुलासे समोर येत आहेत. या प्रकरणाने आता केवळ धार्मिक फसवणुकीपुरते मर्यादित न राहता राजकारण, प्रशासन आणि मोठ्या व्यक्तींपर्यंत पोहोचल्याचे चित्र दिसत आहे.
राष्ट्रवादी काँग्रेसचे नेते अमोल मिटकरी यांनी या प्रकरणात मोठा दावा करत खळबळ उडवली आहे. त्यांनी म्हटले आहे की, अशोक खरात याच्याशी संबंधित तब्बल 500 व्हिडिओ अस्तित्वात आहेत. या व्हिडिओंमधून अनेक मोठ्या अधिकाऱ्यांचे आणि व्यक्तींचे संबंध उघड होण्याची शक्यता व्यक्त केली जात आहे.
यासोबतच VSR कंपनीचा मालक V.K. सिंह हा अशोक खरातचा भक्त असल्याचाही आरोप करण्यात आला आहे. त्यामुळे या प्रकरणात आर्थिक आणि इतर व्यवहारांचे मोठे जाळे असल्याचा संशय व्यक्त केला जात आहे.
सर्वात गंभीर आरोप म्हणजे उपमुख्यमंत्री अजित पवार यांच्या विमान अपघाताशीही या प्रकरणाचा संबंध असू शकतो, अशी शंका मिटकरी यांनी उपस्थित केली आहे. हे विमान नादुरुस्त असताना त्यात बसण्यामागे कोणाचा दबाव होता? यामागे काही कट होता का? असे प्रश्न आता उपस्थित होत आहेत.
याप्रकरणी SIT चौकशीची मागणी करण्यात आली असून, संबंधित व्यक्तींचे फोन कॉल रेकॉर्ड, व्यवहार आणि शिर्डीत झालेल्या कथित गुप्त बैठकींची तपासणी करण्याची गरज व्यक्त केली जात आहे.
दरम्यान, अशोक खरातच्या कथित साम्राज्यामागे नेमकी कोणाची साथ होती, आणि हजारो कोटींची संपत्ती कशी उभी राहिली, याकडेही तपास यंत्रणांचे लक्ष लागले आहे.
या सर्व आरोपांमुळे आता हे प्रकरण आणखी गहिरे होत असून, येत्या काळात अनेक मोठे खुलासे होण्याची शक्यता नाकारता येत नाही.
