---Advertisement---
टेक जगतात कृत्रिम बुद्धिमत्ता अर्थात AI ची स्पर्धा दिवसेंदिवस तीव्र होत असताना आता त्याचा मोठा परिणाम कर्मचाऱ्यांच्या नोकऱ्यांवर दिसू लागला आहे. सोशल मीडिया क्षेत्रातील दिग्गज कंपनी Meta ने खर्च कपात आणि AI वर लक्ष केंद्रित करण्याच्या धोरणाअंतर्गत मोठ्या प्रमाणावर कर्मचाऱ्यांना कामावरून कमी करण्यास सुरुवात केली आहे. या निर्णयामुळे जगभरातील हजारो कर्मचाऱ्यांमध्ये चिंतेचे वातावरण निर्माण झाले आहे.
मीडिया रिपोर्ट्सनुसार, २० मे रोजी कंपनीने विविध देशांतील कर्मचाऱ्यांना अचानक नोकरी संपुष्टात आल्याचे ईमेल पाठवण्यास सुरुवात केली. सिंगापूरमधील काही कर्मचाऱ्यांना स्थानिक वेळेनुसार पहाटे ४ वाजताच ईमेल प्राप्त झाले. “तुमच्या सेवांची आता आवश्यकता नाही,” असा स्पष्ट संदेश या मेलमध्ये देण्यात आला होता. झोपेतून उठल्यानंतर नोकरी गेल्याचे समजल्याने अनेक कर्मचाऱ्यांनी सोशल मीडियावर नाराजी व्यक्त केली.
सध्या कंपनीत सुमारे ७८ हजार कर्मचारी कार्यरत असून, त्यापैकी जवळपास १० टक्के म्हणजेच सुमारे ८ हजार कर्मचाऱ्यांची कपात होण्याची शक्यता व्यक्त केली जात आहे. कंपनीचे मुख्य कार्यकारी अधिकारी Mark Zuckerberg यांनी यापूर्वीच खर्च नियंत्रण आणि AI आधारित भविष्यातील तंत्रज्ञानावर भर देण्याचे संकेत दिले होते.
मिळालेल्या माहितीनुसार, कंपनी यावर्षी AI प्रकल्पांवर तब्बल १२५ ते १४५ अब्ज डॉलर्सची गुंतवणूक करणार आहे. पारंपरिक बिझनेस मॉडेलमध्ये बदल करून आता लहान पण अधिक सक्षम AI टीम्स उभारण्यावर कंपनीचा भर आहे. विशेष म्हणजे, काही कर्मचाऱ्यांना कमी करत असतानाच कंपनी सुमारे ७ हजार कर्मचाऱ्यांना नव्या AI प्रकल्पांमध्ये सहभागी करून घेणार असल्याची माहिती समोर आली आहे. हे कर्मचारी भविष्यात मानवी कामे सुलभ करणारे AI एजंट विकसित करण्याचे काम करणार आहेत.
दरम्यान, केवळ मेटाच नव्हे तर Microsoft, Amazon आणि Cisco यांसारख्या अनेक मोठ्या टेक कंपन्यांनीही गेल्या काही महिन्यांत हजारो कर्मचाऱ्यांना कामावरून कमी केले आहे. AI मुळे टेक इंडस्ट्रीमध्ये वेगाने बदल होत असून भविष्यात रोजगार क्षेत्रावर त्याचा मोठा प्रभाव पडण्याची शक्यता तज्ज्ञांकडून व्यक्त केली जात आहे.
