---Advertisement---
सोशल मीडियावर चर्चेत आलेल्या ‘कॉक्रोच जनता पार्टी’बाबत शिवसेना शिंदे गटाचे आमदार किशोर पाटील यांनी महत्त्वपूर्ण प्रतिक्रिया दिली आहे. एखादा तरुण केवळ आवाहन करतो आणि त्याला देशभरातून मोठा प्रतिसाद मिळतो, हे राज्यकर्त्यांसाठी चांगले संकेत नसल्याचे त्यांनी म्हटले आहे.
‘कॉक्रोच जनता पार्टी’ने सोशल मीडियावर निर्माण केलेल्या चर्चेवर प्रतिक्रिया देताना आमदार किशोर पाटील यांनी सत्ताधाऱ्यांसह सर्वच राजकीय पक्षांनी आत्मपरीक्षण करण्याची गरज असल्याचे स्पष्ट केले. भाजप आणि काँग्रेससारख्या राष्ट्रीय पक्षांचेही सोशल मीडिया रेकॉर्ड मोडले जात असल्याचे उदाहरण देत त्यांनी ही बाब गंभीरपणे घेण्याची आवश्यकता व्यक्त केली.
त्यांनी म्हटले की, आजच्या काळात एखादा तरुण केवळ सोशल मीडियाच्या माध्यमातून आवाहन करतो आणि त्याला संपूर्ण देशभरातून प्रतिसाद मिळतो, ही बाब पारंपरिक राजकारणासाठी विचार करण्यासारखी आहे. त्यामुळे जनतेच्या भावना, तरुणांची मानसिकता आणि सोशल मीडियावरील बदलते वातावरण याचा सर्वच पक्षांनी गांभीर्याने विचार केला पाहिजे.
राजकीय पक्षांनी केवळ निवडणुकांपुरते मर्यादित न राहता जनतेशी संवाद वाढवण्याची गरज असल्याचेही त्यांनी सूचित केले. किशोर पाटील यांच्या या वक्तव्यामुळे राजकीय वर्तुळात विविध चर्चांना उधाण आले आहे.
