---Advertisement---
जळगाव जिल्ह्यातील पारोळा शहरात घरगुती गॅस सिलिंडरचा व्यावसायिक वापर केल्याप्रकरणी पुरवठा विभागाने मोठी कारवाई केली आहे. बसस्थानक परिसरात करण्यात आलेल्या धडक तपासणीत ३ हॉटेल्सवर छापे टाकून ४ घरगुती गॅस सिलिंडर जप्त करण्यात आले आहेत.
पुरवठा विभागाच्या पथकाने शहरातील हॉटेल एकविरा, शीतल डायनिंग आणि अशोक रेस्टॉरंट या आस्थापनांची तपासणी केली. या तपासणीदरम्यान नियमांचे उल्लंघन करून घरगुती गॅस सिलिंडरचा व्यावसायिक वापर केल्याचे निदर्शनास आले. त्यानुसार संबंधित सिलिंडर जप्त करण्यात आले.
या कारवाईचा सविस्तर अहवाल जिल्हा पुरवठा अधिकारी (DSO) कार्यालयाला सादर करण्यात येणार असल्याची माहिती पुरवठा निरीक्षण अधिकारी यांनी दिली आहे. पुढील कारवाईबाबत निर्णय अहवालानंतर घेतला जाणार आहे.
सध्या घरगुती गॅस सिलिंडरवर शासनाकडून अनुदान दिले जाते, तर व्यावसायिक सिलिंडरचे दर तुलनेने जास्त आहेत. या दरातील तफावतीमुळे काही हॉटेल चालक अधिक नफा मिळवण्यासाठी घरगुती सिलिंडरचा गैरवापर करत असल्याचे समोर येत आहे.
या प्रकारामुळे सामान्य नागरिकांना वेळेवर गॅस उपलब्ध होण्यात अडचणी निर्माण होतात. त्यामुळे अशा गैरप्रकारांना आळा घालण्यासाठी प्रशासनाने कठोर भूमिका घेत कारवाई सुरू केली आहे.
दरम्यान, या कारवाईनंतर शहरातील इतर हॉटेल्स आणि व्यावसायिक आस्थापनांमध्येही खळबळ उडाली असून, पुढील काळात अशा प्रकारच्या कारवाया अधिक तीव्र होण्याची शक्यता व्यक्त केली जात आहे.
