---Advertisement---
जळगाव जिल्ह्यात बेकायदेशीर शस्त्र बाळगणाऱ्यांविरोधात पोलिसांनी मोठी कारवाई केली असून गेल्या २४ तासांत धरणगाव आणि भुसावळ येथे वेगवेगळ्या कारवाया करत तीन आरोपींना अटक करण्यात आली आहे. या कारवाईत दोन गावठी पिस्तूल, मॅग्झिन आणि एक जिवंत काडतूस जप्त करण्यात आले असून एकूण ६६ हजार रुपयांचा मुद्देमाल हस्तगत करण्यात आला.
धरणगाव परिसरातील गिरणा नदीपात्रात एक संशयित इसम फिरत असल्याची माहिती पोलिसांना मिळाली होती. त्यानुसार पोलिसांनी सापळा रचत आरोपीला ताब्यात घेतले. झडतीदरम्यान त्याच्याकडून गावठी बनावटीचे पिस्तूल आणि मॅग्झिन जप्त करण्यात आले. आरोपीकडे कोणताही शस्त्र परवाना नसल्याचे तपासात उघड झाले.
तसेच भुसावळ शहरात मध्यरात्री पोलिसांनी आणखी एक मोठी कारवाई केली असून शिरपूर-कन्हाळा रोड परिसरातील मोकळ्या जागेत संशयास्पद हालचाली सुरू असल्याची माहिती मिळाल्यानंतर पोलिसांनी धाड टाकली. या कारवाईत दोन जणांना अटक करण्यात आली. त्यांच्याकडून गावठी पिस्तूल आणि जिवंत काडतूस जप्त करण्यात आले.
दोन्ही प्रकरणांमध्ये संबंधित आरोपींविरोधात गुन्हे दाखल करण्यात आले असून पुढील तपास सुरू आहे. जळगाव जिल्ह्यात अवैध शस्त्रांविरोधात पोलिसांची मोहीम आणखी तीव्र करण्यात येणार असल्याचे सांगितले जात आहे.
